Tvillingane Magne og Åge Grimstad inviterer igjen til si spesielle førestilling om kreft og livslyst som dei kallar "Verda treng oss». Denne gongen torsdag 5. mars i Fosnavåg konserthus. Førestillinga kombinerer humor, personlege historier og djupe refleksjonar over livet med kreft. Magne og Åge, som begge har kjempa mot kreft, delar sine opplevingar og viser korleis dei har funne styrke og livslyst gjennom utfordringane. Som sist vert det også allsong og framføring av eigne songar. 

Førestillinga byggjer på den same som brørne hadde då dei turnerte i Sør-Norge sist haust. Då skreiv Sunnmørsposten mellom anna: "Både Åge og Magne er særs taleføre. Det kan vere lett å miste motet når ein har ein slik fæl sjukdom som råkar ein på nytt og på nytt. Men det har ikkje desse to karane gjort. Det vart framført fleire flotte songar denne kvelden. Me fekk høyre den dramatiske historia om korleis dei mista mor si, men det var også ein barndom full av mykje samhald og glede. Dei fortalde nakent og ærleg om korleis det er å leve med kreft."

Førestillinga er gratis, men publikum må "kjøpe" seg ein plassbillett her inne på nettsida. Då får du også sikra deg eit sete. Dei har eit hårete mål om å samle inn ikkje mindre enn 1,2 millionar kroner til å støtte kreftforskinga og hjelp til kreftpasientar. Bilda er frå forestillinga i Ulsteinvik

I Herøy vert førestillinga arrangert i samarbeid med Fosnavåg konserthus og kreftkoordinatoren i Herøy. Etter framsyninga vil det vere enkel kaffe og te for den som skulle ha lyst til å stanse igjen i foajéen ei lita stund.